Den 16. juni blir det blues på Lakketorget, Lakkegata 55 i Oslo.
Laurdag 16. juni blir det sommarfest for alle som likar blues, på Lakketorget kulturmarked i Lakkegata 55, Oslo. Eg har fått æra å bli invitert som ein av fem band/artistar denne kvelden, og går på scena rundt 19:00, men festen startar allereie 16:00, med livemusikk frå første sekund. Åpent for alle. Andre band: Toni and the Tomcats, Pigalle blues band, Green Carpet. Satsar på knallvêr …
Mest om bygdas eigen store son … men det dryp litt på meg og. Eg trur nok ikkje eg var fullt så anonym som denne arrikkelen skulle tyda på. Og det eg blei sitet på har eg nok aldri sagt … ja, ja.
Takk til alle dei 100 som var med og motbeviste den eldgamle myten at fredagen er ein håplaus konsertdag og at folk heller vil vera heime med Almaas og Skavlan. Fullt hus og god stemning i Båstad kirke fredag då Trygve Skaug og eg heldt konsert der. Vi skuldar nok ein del til avisa Smaalenene … Eg legg ved førehandsomtalen her.
Benedicte Torget
11. april skal eg spela nedkjøling for Benedicte Torget på Josefine visescene i Oslo (det må jo heita det når eg skal spela etter hovudartisten – å spela før heiter jo oppvarming …). Det skjer på kvelden. Hallgrim Bratberg er med henne på gitar. Det blir sikkert kjempefint. Kanskje tar det heilt av. Får håpa eg klarar å roa ting etterpå, då. Adressa er Josefinesgate 16 i Oslo. Vel møtt, som alltid.
Det har vore dårleg med oppdateringar her i det siste. Eg har vore ein del ute på speletur. Først til Vågsbygd med Trygve Skaug, så Buckleys i Oslo åleine med gitaren, så til Ulsteinvik og Emblem med heile StMorritz (som i skrivande stund nett er blitt A-lista på P1 med låta “Like små”! Det betyr enkelt sagt at den kjem til å bli spelt masse på radioen utover seinvinteren). Siste staden vi spelte var også Sunnmørsposten på pletten og skreiv ei rett så fin melding. Takk til alle som stakk innom den eine eller den andre staden. Og så kan eg jo minna om nokre oppdateringar i spelekalenderen. Fleire kjem snart, så det er bare å følgja med.
Nedteljinga er i gang til neste konsert i Oslo, laurdag 4. februar. Nedteljinga og oppvarminga får eg vel sei, for eg fingrane fulle med øving og flikking. Då gjer det godt med oppmuntrande ord som desse frå arrangøren:
Arne Olav L. Hageberg er sanger, gitarist og låtskriver inspirert av blues, folk og country. Vi ble mektig imponert over hans opptreden på Rampelys-scenen i høst, og det er en glede å ha ham tilbake på Buckleys!
Eg går på klokka 22:00. Følg meg på Facebook, så får du direkte invitasjon.
Trykk på biletet for å sjå videoen på YouTube.
Mi YouTube-karriere starta brått med ein video av Lyset va så fint i dag (teksten ligg på tekstsida). Eg håpar og trur at det er starten på eit langt og intenst samarbeid:) Altså at eg klarar å laga fleire videosnuttar eg tør å legga ut. Håpar den fell i smak.
No har eg fått meg musikar/band-side på Facebook. Det betyr at du får oppdateringar rett i feeden om du “likar” meg der. Viktige oppdateringar kjem til å koma både her på heimesida og på Facebook. Eg nyttar høvet til å minna om at heimesida mi også kan følgjast via RSS-feed. Om det eg har skrive her no verkar teknisk og nerdete og nokså uforståeleg, kan eg trøysta med at det funkar bortimot like bra å gå jamleg inn på denne sida og sjekka kva som måtte ha dukka opp av nye ting.
Laurdag 4. februar blir det dobbeltkonsert i regi av Oslo Bluesklubb. Eg deler kvelden med den Trondheim-baserte duoen Rootwork, som leverer deltablues i rå tapping. Det er snakk om akustisk gitar, trampande puls og song, veldig i same gata som eg held meg, altså. Viktor Wilhelmsen (gitar) og Roger Karlsen (vokal) tolkar musikk av Robert Johnson, Son House og Skip James. Eg gler meg veldig til å høyra dei! Men først skal eg i vinden sjølv, så om du er interessert i å få med deg begge må du vera på Buckleys seinast klokka 22:00 denne februarkvelden.
Eg oppfordrar alle til å turen, om det er for å høyra på Rootwork, på meg, eller rett og slett for å støtta opp om ein pub som har eit stort hjerta for livemusikk generelt og blues spesielt. Buckleys er ganske unge (fire år 26. januar) og er framleis i ein oppbyggings-og-klamre-seg-fast-fase. All ære til Raymond Stubben og dei andre entusiastane på Buckleys som gjer alt dei kan for å oppretthalda eit levande musikkliv i Oslo!
